Өлөөн улууһугар, “Сигундэр” диэн үтүөнү оҥорор пуонда туһунан истибэтэх киһи, бука аҕыйаҕа буолуо. Бу күннэргэ биһиги пуонда тэрийээччитэ Христофор Павлович Васильевы кытары көрсөммүт аҕыйах ыйытыыларга эпиэттииригэр көрдөстүбүт.

— Христофор Павлович, бу үтүөнү оҥорор пуонданы тэрийэр туһунан санаа эйиэхэ хаһан киирбитэй?

— 2020 cыллаахха биһиги дьиэ-кэргэҥҥэ ыарахан кэм үөскээбитэ. Ол курдук, мин кэргэним улаханнык ыалдьан, Кореяҕа баран эмтэнэр буолбута. Онно биллэн туран, аҕыйаҕа суох үп наада этэ. Бу кыһалҕалаах кэммитигэр, биһиэхэ улууспут дьоно-сэргэтэ улахан көмө, өйөбүл буолбуттара. Бу түбэлтэ кэнниттэн, мин биир дойдулаахтарбар улахан махталбын биллэрэн туран, бу пуонданы тэрийэргэ санаммытым. Ити курдук, пуондабыт 2021 сыл от ыйын 14 күнүгэр тэриллибитэ.

Сигундэр – эбэҥк., солнечный (рус), күн саһарҕата (сах).  

— Пуондаҕыт сүрүн сыала-соруга туохха сытарый?

— Бу пуонда ыарахан ыарыыларга ыалдьыбыт дьоҥҥо эмтэнэллэригэр, кинилэр дьиэ кэргэттэрэ эмтэнэ баралларыгар, бырайыастарын төлөһөллөрүгэр көмө буолаарай диэн сыаллаах-соруктаах тэриллибитэ.

— Бу маннык, үтүөнү оҥорор пуонданы, тэрийэр туох уустуктардаах эбитий?

— Оннук улахан уустуктары көрсүбэтэҕим эрээри, биллэн туран, пуонданы ыллыҥ да тэрийбэккин. Манна элбэх тустаах докумуон оҥоһуллан, юстиция Министиэристибэтигэр регистрацияны ааһан тэрийэҕин.

— Пуонда бастаан тэриллиэҕиттэн туох уларыйыылары киллэрдигит?

— Суһал байыаннай дьайыы саҕаламмытыгар пуондабыт Устаабыгар уларытыылары киллэрбиппит. Ол курдук, биһиги мобилизацияланан, бэйэлэрин баҕа өттүлэринэн уонна контракт баттаһан суһал байыаннай дьайыыга кытта сылдьар биир дойдулаахтарбытыгар уонна кинилэр дьиэ кэргэттэригэр көмөлөһөр буолбуппут: бородуукта атыылаһалларыгар, коммунальнай өҥөлөрүн төлөһөллөрүгэр, санаторнай-курортнай эмтэнээһини ааһалларыгар, ону тэҥэ сыаналаах эмтэри ылан эмтэнэллэригэр, уо.д.а. наадаларыгар.

Маны таһынан, бу кэлин, пуонда Устаабыгар үөрэх салаата сайдарыгар, култуураҕа, искусствоҕа, экологическай култуураҕа, дойдуга бэриниилээх буолууга иитиигэ-такайыыга, волонтердааһыҥҥа, социальнай көмөлорү оҥорооһуҥҥа, ону таһынан, айылҕа иэдээннэриттэн, холобур, уу халааныттан эмсэҕэлээбиттэргэ көмө оҥорорго эбиилэр киллэриллибиттэрэ.

Подробнее https://xn--80aaaaaqemr0d4akx.xn--p1ai/hristofor-vasilev-is-syrehpitten-mahtanabyn/