Күннээх Ээйиккэ ыһыах ыстылар

Ээйик сиригэр, бэс ыйын 21 күнүгэр самаан сайыны көрсө, ыһыах ыһылынна. Түөлбэлэринэн түһүлгэ тардылынна, ырыа ылбаҕайа ылланна, үҥкүү үтүөтэ толорулунна, күн устата тиһигин быспакка күрэх арааһа оонньонно.

Ол курдук, оҕолорго ыытыллыбыт мас тардыһыытын, хапсаҕайдаһан тустуу күрэхтэригэр Васильев Игорь эт саастыылаахтарыгар тэҥнээҕин булбата.

Дьахталларга сүүрүүгэ, мас тардыһыытыгар

олохтоох балыыһа сиэстэрэтэ Васильева Прасковья Ивановна иннин кимиэхэ да биэрбэккэ, эрэллээхтик кыайыы көтөлөннө.

Эр дьон күрэхтэригэр, хапсаҕайга Муҥутуур кыайыылаах аатын эдэр уол Антон Афанасьев ылла.

Онтон мас тардыһыытыгар Кыргызстан сириттэн-уотуттан биһиги Ээйикпитигэр тутууга үлэлии-хамсыы кэлбит ыалдьыппыт Сыртбай Уулу Женишбек эгил-тэгил киирсиилэр түмүктэригэр кыайыылааҕынан таҕыста.

Ыһыахпыт биир сүрүн тэрээһинигэр — Дыгын оонньуутугар 11 эр бэрдэ кытынна. Бу сырыыга 7 көрүҥ түмүгүнэн кыайыылааҕынан Ээйик орто оскуолатын учуутала, улуус биллиилээх спортсмена Леонид Соломонов таҕыста.

Подробнее: https://xn--80aaaaaqemr0d4akx.xn--p1ai/article/62046