Дьоһун ыччат элбиэҕэ

Кэнчээрибит туһугар 

Кэскиллээҕи түстүөххэ,

Инникитин салайан

Үгэспитин тиэрдиэххэ.

Сиэри-туому тутуһан

Иллээх буола үүннүннэр,

Өйөһөннөр үөрдүннэр,

Сайдар суолга тиийдиннэр.

Сиргэ-уокка тапталы

Илдьэ сылдьар буоллуннар,

Үрүҥ күҥҥэ махталы

Мэлдьи анаан тиэртиннэр.

Саҥа кэмҥэ үктэли

Итэҕэйэн аастыннар,

Олохторун оҥостон

Дьиҥнээх дьолу биллиннэр.

Олус кэрэ буолуоҕа,

Түһүлгэтэ кэҥиэҕэ,

Көрбөтөҕүн көрүөҕэ,

Истибэтин истиэҕэ.

Араас сиргэ тиийиэҕэ,

Эрэллээхтик хардыылыа,

Омуктардыын алтыһыа,

Тылы туттан баһылыа.

Дьоһун ыччат элбиэҕэ,

Билии аанын аһыаҕа,

Сыһыан кытта тупсуоҕа,

Уйгу олох кэлиэҕэ.

Харахтара арыллыа,

Ситиһиитэ үрдүөҕэ,

Дойдуларын ааттатар

Өрөгөйү тутуоҕа!

Розалия Павлова.

Өлөөн.

28.02.2022с.

Источник: @redsardana