Кирбэй нэһилиэгин Далбар Хотуттара өбүгэ ураһатын таҥаһын тигээри бэлэмнэнии үлэтин ыыта сылдьаллара

Кирбэй нэһилиэгин Далбар Хотуттара бу күннэргэ мунньустан тирии имитиитин көҕүлээн өбүгэ ураһатын таҥаһын тигээри бэлэмнэнии үлэтин ыыта сылдьаллара хайҕаллаах. Көҕүлээччилэр Саха республикатын норуотун маастара Надежда Колодезникова уонна уус-уран оҥоһук маастара Мария Егорова буолаллар. Манна имитиини баһылаабыт, саҥа туппут үөрэнээччилэр эдэр кыргыттар бары санааларыттан көмөлөстүлэр. Норуот күүһэ-көмүөл күүһэ диэн мээнэҕэ эппэттэрэ чахчы. Имии бүтэн бары бииргэ көмөлөөн «Илькээни» этнокултуурнай кииҥҥэ ураһа тигиитин саҕалаатылар, манна Кирбэй олохтоохторо бэйэлэрэ баҕа өттүнэн кэлэн кыттыыны ыла сылдьаллара хайҕаллаах. Бу үлэ түмүгэ, оройуоммут үбүлүөйдээх сылыгар аналлаах сүлүөккэ силигин ситэн Өлөөн эбэҕэ табаһыттар бырааһынньыгар кэрэ көстүү буолуохтаах.

Өбүгэ күүһүн иҥэринии куйаартан тиһиллэр ураты эйгэ буолар. Хоту дьахталлар өбүгэттэн кэлбити эдэр ыччакка иҥэрэр, үөрэтэр эбээһинэспит буолар, өбүгэлэрбит тугу оҥорбуттарын саҥалыы оҥорон таһааран уос номоҕор киирдэҕинэ, эдэр ыччат иҥэриннэҕинэ иэримэ дьиэбит ичигэһинэн, сылааһынан  угуттуо. Бука бары этэҥҥэ буолуоҕуҥ! Сырдык санаабыт сыдьаайа турдун, сайдар-үүнэр ыччаттарбыт дьоллоох эрэ буоллуннар. Орто сиэри тутуһан олоруоҕуҥ, төрөөбүт Өлөөммүт сайдарын, тупсарын туһугар, эбэҥки буолан сайдыаҕыҥ!

Управление культуры Оленекского района