Өлөөҥҥө «Хоһуун оонньуулара – 2023» күрэх сүрүн түмүктэрэ

Саха саҥа дьылын бэлиэтээһин Ыһыах бырааһынньыгар саха национальнай оонньууларын 7 көрүҥэр – үс төгүл үс, тутум эргииригэр, мас тардыһыытыгар, маамыкта быраҕыытыгар, 400 миэтэрэҕэ сүүрүүгэ, хапсаҕай тустууга, таас көтөҕүүтүгэр — «Хоһуун оонньуулара – 2023» многоборье күрэҕэ тэриллэн ыытылынна. Бу дьыллааҕы «Хоһуун оонньуулара – 2023» күрэх кыайыылаахтарыгар көрүллүбүт бириистэр «сэмэй» соҕустарынан дьон-сэргэ интириэһин намтатан, күрэхтэһиигэ кыттааччы уонна спортсменнары уруйдуур-айхаллыыр ыалдьааччы аҕыйахтарынан урукку сыллартан уратылаах буолла.

Ону сэргэ, бу дьыллааҕы күрэх түмүгүнэн урукку сылларга олохтоммут рекордар саҥардыллыбатахтара спорт национальнай көрүҥнэригэр идэтийэн дьарыктанар тренердэр ситэ үлэлээбэттэрин көрдөрдө.

«Хоһуун оонньуулара – 2023» күрэҕэр 7 эрэ боотур күрэс былдьаһаннар Саха национальнай спордун көрүҥнэригэр идэтийэн дьарыктанар ыччаттар аҕыйаабыттарын туоһута буолла.

Икки күннээх күрэх түмүгүнэн «Хоһуун оонньуулара – 2023» муҥутуур кыайыылааҕынан 20 очконы ылан, Кирбэй национальнай нэһилиэгин эдэр ыччата Иннокентий Матвеев кыайыы өрөгөйүн өрө тутан бастакы миэстэҕэ таҕыста, уонна оройуон дьаһалта туруорбут 50,0 тыһ. солк. бирииһин хаһаайына буолла.

Иккис бириистээх миэстэҕэ Өлөөн национальнай нэһилиэгин ыччата Эдуард Еремеев 22 очконы ылан тахсан оройуон дьаһалта туруорбут 30,0 тыһ солкуобайынан биһирэннэ.

Үһүс бириистээх миэстэҕэ Кирбэй национальнай нэһилиэгин ыччата Егор Семенов 25 очконы ылан тахсан оройуон дьаһалтата туруорбут 20,0 тыһ.солк бирииһин тутта.

Саха национальнай спордун көрүҥнэрин интириэһиргээччилэргэ анаан «Хоһуун оонньуулара – 2023» түмүк боротокуолун бэчээттээн билиһиннэрэбит.

Источник: https://сарданагазета.рф/article/100906