Лыахтар мин испэр…

16:27, 05.01.2024

Саҥа 2024 сылы көрсөр абылаҥ түһүлгэҕэ тохсунньу ый 4 күнүгэр Кииннэммит бибилэтиэкэ дьиэтигэр биһиэхэ айар куттаах, алгыс аартыктаах эдэр суруйааччы Астра Яковлева кэрэ бэлиэ түгэни бэлэх уунна, буруолуу сылдьар бастакы айымньытын «Бабочки внутри» кэрэхсэбиллээх кинигэтин ааҕааччыларыгар билиһиннэрэн дойдутун дьонун үөртэ, ол курдук уйадытта даҕаны…

Атырдьах ыйыгар күн сирин көрбүт Астра Яковлева, уруккута Галина Семенова, Өлөөнү төрүттэспит Спиридон Ксенофонтович Боескоров хос сиэнэ, 2007 сыллаахха Өлөөн орто оскуолатын үрүҥ көмүс мэтээлинэн бүтэрэн, салгыы ХИФУ экэнэмиис идэтин ситиһиилээхтик бүтэрбитэ. Сунтаартан төрүттээх олоҕун аргыһын Прокопий Яковлевы көрсөн, ыал буолан, алаһа дьиэ тэринэн, икки оҕо тапталлаах ийэтэ ааты ылар. Галинка Ийэтэ Марина Викторовна киин балыыһа сүрүннүүр сиэстэрэтэ, аҕата Платон Гаврильевич уот ситимин тутаах үлэһитэ. Бииргэ төрөөбүт үһүөлэр, бары да олус талааннаах ыччаттар, Галя экономист, суруйааччы, Гаврил самбо көрүҥэр Арассыыйа успуордун маастара, кыра кыыс Айза Орончикан ансаамбыл солистката, үҥкүүһүт бэрдэ. Бэрт соторутааҕыта Галя быраата Гаврил Семенов кэргэнинээн Варялыын, кийииппит тхэквондо көрүҥэр Арассыыйа маастара, успуорду сөбүлүүр, өрө тутар биир дойдулаахтарыгар, оҕолорго умсугутуулаах маастар кылаас көрдөрөн бардылар.

Биһиги Галябыт кыра эрдэҕиттэн суруйар талааннаах, балтараалаах кыыс хоһоон ааҕан элбэх дьону соһуппуттаах. Ол курдук, оскуолаҕа үөрэнэр сылларыгар нуучча тылын уруогун сөбүлээн, эбээлэрин нуучча тылын уонна литэрэтиирэтин учууталларын Галина, Мария Спиридоновналар ааттарын ааттатар, эбээтин Галина Спиридоновна аатынан сүрэхтэммит сиэн кыыс буолар.

Бу күн Галябыт айымньытын алгыс кэһиилээх киэргэттилэр эһээлэрэ Гаврил Платонович Семенов, Владимир Афанасьевич Бятинскай, Астраҕа кынаттыыр тылларынан биир дойдулаахтара Валентина Саввична уруу-аймах аатыттан, Надежда Прокопьевна култуура салаатын салайааччыта, Мария Христофоровна үөрэҕирии салаатын хотуна, Наталья Гаврильевна – нуучча тылын уонна литэрэтиирэтин учуутала, Вера Семеновна – алын кылаас убаастабыллаах учууталбыт, Марта Васильевна суруйар дьоҕурдаах Далбар Хотун, Астра ийэтин уонна аҕатын бииргэ үөрэммит үөлээннээхтэрэ, Өлөөн орто оскуолатын 1986 сыллааҕы выпуһун хотуттара сэмэй бэлэхтэрин туттаран, үтүөнү баҕаран алҕаатылар.

Кииннэммит бибилэтиэкэ дириэктэрэ Екатерина Васильевна Астра оҕо сылдьан бу тэрилтэ бастайааннай ааҕааччыта, эдэр кэрэспэндьиэн аатын сүкпүт киэҥ билиилээҕин бэлиэтээтэ, анал кэмбиэргэ кистэнэ сылдьар оҕолор суруктарыттан ылан Астра уон саастааҕар суруйан хаалларбыт суругун ааҕан иһитиннэрдэ, тэрээһини иилээн-саҕалаан ыытта Астра ийэтин дьүөгэтэ Екатерина Васильевна Иванова.

   

Айар киэһэтин, үлэтин түмүгүн үөрүүтүн үллэстэ кэлбит чугас дьоно, ыалдьыттара хас биирдиилэригэр тус санаа үөскээн, кинигэ тутуурдаах дьоллонон, саҥа дьыллааҕы бэлэҕи тутан тарҕастылар.

Онтон бэйэм бэҕэһээ тутатына дьиэбэр кэлээт, бэлэх кинигэбин арыйа баттаат, бастакы санаабын үллэстэбин. Дьэ эрэ доҕоттор, бестселлер бастакы кэпсээнин аахтым уонна дьиҥнээх киинэ көрбүт курдук сананным, кырдьык биир тыынынан, утаппыттыы амсайан ыллым, харахпар одуулаан көрдүм, испэр лыах үҥкүүтэ кычыкалатыахча, иккиһи, үсүһү… аахтахха сиһилии кэпсиэм…астык, астынным, ардыгар Дженнины аһынным, ол курдук айылҕалыын алтыстым, кинигэ кистэлэҥэ кини таайбараҥар…Астра, ай-тут, аят-аят!!!

Ыраас хаар, ыраастаатын Эн санааҕын…

Ыраах тыал, көтүттүн Эн толкуйгун…

Маҥан хаар, кистээмэ Галябыт көҥүлүн…

Мааны тыал, арыйаар Астрабыт айымньытын…

 

 

Балаһаны бэлэмнээтэ Эльвира Яковлева,

уопсастыбаннай кэрэспэндьиэн,

Өлөөн бөһүөлэгэ, тохсунньу ый 5 күнэ, 2024 сыл.

Читайте также

10:41, 29.02.2024

Второй рабочий день правительственной группы в Оленекском районе

Делегация объезжает объекты сел Оленька и Харыялах. Побывали в новых котельных, проверили ход работы в строящемся жилом каменном доме, ознакомились с работой местных предпри...

10:39, 29.02.2024

В труднодоступных наслегах Оленекского района состоялся Отчет Правительства Якутии

Сегодня, прибывшая в Оленекский эвенкийский национальный район правительственная рабочая группа разделилась на две подгруппы и выехала в самые труднодоступные, отдаленные насле...

10:34, 29.02.2024

Мероприятия приуроченный 55-летию Главы Муниципального района «Оленёкский эвенкийский национальный р...

Оленек готовится к памятным мероприятиям, приуроченным 55-летию безвременно ушедшего из жизни Главы Муниципального района «Оленёкский эвенкийский национальный район» (1913-2020...

Комментарии0

Еще нет аккаунта?

Регистрация