Балыктааһын боппуруоһа болҕомто киинигэр турда

Бу күннэргэ Өлөөн эбэҥки национальнай оройуонугар Российскай Федерация балыктааһын боппуруоһугар Агентствотын Саха сиринээҕи салаатын салайааччытын эбээһинэһин толорооччу Вячеслав Толстоухов уонна Ленскэйдээҕи балык инспекциятын салайааччыта Роман Фисак оробуочай сырыыны аан бастаан оҥордулар. Улуус дьаһалтатын аактабай саалатыгар дьаһалта баһылыгын бастакы солбуйааччы Иван Саввинов интириэстээх тэрилтэ салайааччыларын кытта оробуочай көрсүһүүнү тэрийэн ыытта. Балыктааһын боппуруоһугар Федеральнай Агентство Саха сиринээҕи салаатын салайааччытын эбээһинэһин толорооччу Вячеслав Толстоухов балыктааһын туһунан федеральнай сокуону олоххо киллэриигэ уонна уларытыылары, этиилэри киллэриигэ Федеральнай Агенство 2020 сыллааҕы олунньу ый 18 күнүнээҕи 85-с №-дээх бирикээһигэр олоҕуран ыытыллар тэрээһиннээх үлэни билиһиннэрдэ.

Балыктааһын инспекциятын Ленскэй оройуонунааҕы салаатын судаарыстыбаннай инспектора Роман Фисак Өлөөн оройуонун сиригэр-уотугар промысловай суолталаах сыаналаах балыктар үөскээбэттэринэн сибээстээн балыктааһыны хонтуруоллуур инспектор көрүллүбэтин иһитиннэрдэ.

Федеральнай сокуоҥҥа олоҕуран аҕыйах ахсааннаах олохтоох төрүт норуоттар бэрэстэбиитэллэрэ бэйэлэрэ аһыылларыгар балыктааһыннара сокуонунан көрүллүбүт бириэмэҕэ көҥүллэнэрин билиһиннэрдэ. Көҥүлү аҕыйах ахсааннаах төрүт норуоттар бэрэстэбиитэллэрэ анал федеральнай реестргэ киирэн регистрацияланан, Айылҕа харыстабылын министерствотыттан ылыахтаахтарын бэлиэтээтэ.

Оробуочай көрсүһүүгэ кыттыыны ылбыт Өлөөн оройуонунааҕы Айылҕа харыстабылын инспекциятын салайааччыта Спиридон Соломонов, «Кулунчук» аҕа ууһун общинатын баһылыга Павел Васильев, оройуоннааҕы аҕа ууһун общиналарын Сэбиэтин бэрэссэдээтэлэ Алексей Сергеев, олохтоох төрүт салаалары сайыннарар сирдэрэ (ТТПП) дирекцияларын салайааччыта Анатолий Лебедев уонна да атын оробуочай көрсүһүү кыттыылаахтара балыктааһыны тэрийии, балыктааһын учаастактарын быһаарыы уонна сыһыарыы, этиилэрин киллэрэн санаа атастастылар.

Федеральнай Агентство бэрэстэбиитэллэрэ интириэстээх тэрилтэ салайааччыларыттан киирбит бары боппуруостарга сиһилии быһаарыылары, сүбэлэри биэрдилэр.

Подробнее: https://сарданагазета.рф/article/93540