Лааҕырдар бастакы сезону түмүктээтилэр

Оҕо саас. Каникуллар, сайыҥҥы лааҕыр, сөтүө. Хас биирдии оҕо күүтэр кэмэ, оҕолору кытта оонньоору, чэбдигирэ, үлэ-сынньалаҥ лааҕырга киирэн саҥа доҕоттордоноору, тугу эрэ атыны бэйэҕэ ылынаары. Сылын аайы оҕолорго анаан араас хабааннаах лааҕырдар үлэлииллэр. Оҕолор сайыҥҥы сынньалаҥнарын туһалаахтык атаараллар. Ол курдук, Харыйалаахха Х.А.Христофоров аатынан оскуола-саад иһинэн “Патриот, “Урожай”, “Радуга” лааҕырдарга араас саастаах оҕолор түмсэн сырыттылар. Лааҕырдар бэс ыйын 6 күнүттэн арыллан баран бу ый 26 күнүгэр бастакы сезону үлэлээн түмүктээтилэр. Спортивнай, эти-хааны чэбдигирдэр “Патриот” лааҕырга 25 оҕо дьарыктаннылар. Иитээччилэр Аммосов Степан Кимович, Семенов Егор Иосифович буолан оҕолору бөҕө-таҕа буоларга эрчиллиилэри үөрэттилэр. Сарсыарда сүүрүүттэн саҕалаан эрчиллии, футбол оонньуута.

Иккис “Урожай” үлэ-сынньалаҥ лааҕырыгар 10 оҕо теплицаҕа оҕуруот аһын олордон, тыа, оҕо оонньуур быласааккатын сыыстарын, бөхтөрүн хомуйдулар, араас маастар-кылаастарга астына дьарыктаннылар.

“Илкээнньи” культура-сынньалаҥ киинигэр Оксана Егоровна гитараҕа оонньуон баҕалаах оҕолорго маастар-кылаас ыытта. Иитээччи Туяра Уодай оҕолорго сибэкки олордуу, көрүү-харайыы ымпыгын-чымпыгын үөрэттэ, көрдөрдө. Ити курдук оҕолор иитээччилэрин ыйыытынан кэрдиитинэн үлэни, сынньалаҥы тэҥҥэ дьүөрэлээн туһалаахтык сынньаннылар.

Кыра кылаас үөрэнээччилэригэр аналлаах “Радуга” лааҕырга Арианда Алексеевна Николаева, Семенова Кристина Иосифовна 25 оҕону хомуйан иитээччинэн үлэлээтилэр. Итээччилэр иккиэн алын кылаас учууталлара буоланнар биир сүбэнэн кыра кылаас үөрэнээччилэригэр күн аайы араас тэрээһиннэри тиһигин быспакка ыытаннар оҕолор күннэрин да билбэккэ хаалбыттар.

Ол курдук, маастар-кылаастар, «День шляпы”, «День России”, “День сказок”, «День ПДД”, «День эколога”, “День фильма”, “День добрых дел”, “День Цветов”, «Мисс и Мистер 2023” курдук олус интэриэһинэй ис хоһоонноох тэрээһиннэр ыытыллыбыттар. “Мисс и Мистер 2023”
кыайыылаахтарынан Аселя Комбагир уонна Кирилл Готовцев ааттаммыттар.

Лааҕыр оҕолоругар асчытынан Прасковья Лганова, медигынан Галина Сергеева үлэлээтилэр. Лааҕырдар сабыллар тэрэһиннэрин олохтоох библиотека үлэһитэ Василисса Белолюбская көрдөөх оонньуулары тэрийэн бэрт сэргэхтик ыытта. Оҕолор сынньалаҥнарын үөрэ-көтө атаарбыттарыттан төрөппүттэр махталлара улахан.

Источник: https://сарданагазета.рф/article/100902