Өлөөннөр үөрүүлээхтик Өрөспүүбүлүкэ күнүн бэлиэтээтилэр

Өлөөн сэлиэнньэтинээҕи А.С.Иванов аатынан “Илкит” этнокултуура киинигэр Саха Өрөспүүбүлүкэтин судаарыстыбаннаһа тэриллибит өрөгөйдөөх күнүн үөрүүлээхтик бэлиэтээһин тэриллэн ыытылынна. Үөрүүлээх тэрээһин Саха Өрөспүүбүлүкэтин өрөгөй ырыатынан доҕуһуолланан арыллан дьон сүргэтин көтөхтө, мустубут оройуон олохтоохторун дууһаларын, санааларын саҥа үрдүк таһымҥа таһаарда.

Хаһаайыстыбаннай актыыб кыттыылаахтарын «Өрөспүүбүлүкэ күнүгэр — саҥа саҕахтары арыйбыт» диэн эҕэрдэ этиинэн оройуон дьаһалтатын баһылыгын бастакы солбуйааччы Иван Саввинов эҕэрдэлээһининэн саҕаланна. Салгыы өрөспүүбүлүкэ күнүн көрсө үрдүк таһаарыылаах үлэни көрдөрбүт Үлэ сылын бастыҥнарын үөрүүлээхтик бэлиэтээһин тэриллэн ыытылынна. Бу бэлиэ күнү көрсө муниципальнай оройуон дьаһалтатын Бочуотунай грамотатынан наҕараадаламмыт үлэ бастыҥнарыгар Боескоров И.И. — «Эрэл» ХЭТ операторыгар, Томская Н.Н. — олоҕу-дьаһаҕы хааччыйар коммунальнай тэрилтэ үлэһитигэр, Иванов Е.Д. — «Өлөөн» МУТ 3 №-дээх таба иитэр биригээдэтин биригэдьииригэр, Николаева В.Ю. — «Сахаэнерго» АУо Өлөөннөөҕү уотун ситимин инженеригэр, Николаев Ю.А. — олоҕу-дьаһайы хааччыйар коммунальнай тэрилтэ Дьэлиҥдэтээҕи учаастагын маастарыгар, Семенов С.С. — Дьэлиҥдэтээҕи врачебнай учаастак фельдшеригэр, Николаева М.И. — үөрэх оройуоннааҕы управлениетын солбуйааччы начальнигар, Николаева А.Т. — оройуоннааҕы ветеринарнай управление юрист-консультаныгар оройуон дьаһалтатын баһылыга Лена Иванова истиҥ эҕэрдэтин этэн туран наҕараадалары туттартаата.

Маны тэҥэ Өлөөн эбэҥки национальнай оройуонун социальнай-экономическай сайдыытыгар өр сыллаах үлэлэрэ судаарыстыбаннай наҕарааданан бэлиэтэммит муниципальнай сулууспалаахтарга наҕараадалары туттарыы тэриллэн ыытылынна.

Норуот национальнай култууратын V-с эригийиэннээҕи көрүү «Мир Арктики» кыайыылаахтарыгар Николаева Валентина Трофимовнаҕа, норуот маастардара Полуэктова Розалия Ивановнаҕа, Винокурова Евдокия Васильевнаҕа анал дипломнар уонна сертификаттар туттарылыннылар.

Салгыы үөрүүлээх тэрээһин кыттыылаахтарын эҕэрдэлээн, өрөспүүбүлүкэ күнүн суолтатын бэлиэтээн бэйэлэрин этиилэрин оҥордулар: Сергеев А.С. — оройуон депутаттарын Сэбиэтин «Суглан» бэрэссэдээтэлэ, Иванова М.Х. — үөрэх оройуоннааҕы управлениетын начальнига, Харабаев В.А. — аҕалар оройуоннааҕы түмсүүлэрин солбуйааччы бэрэссэдээтэлэ, Петров И.Е. — Харыйалаах орто оскуолатын дириэктэрэ, Алексеев Айсен — Өлөөн орто оскуолатын IX кылааһын үөрэнээччитэ.

Хас биирдии эҕэрдэ этии кэнниттэн Саха сирин айхаллыыр-уруйдуур ырыалар, литературнай ааҕыылар, композициялар, норуот үҥкүүлэрэ, видеороликтар, оҕо искусствотын оскуолатын үөрэнээччилэрин толоруулара тэриллэн ыытылыннылар.

Өрөспүүбүлүкэ күнүгэр аналлаах өрөгөй күн «Сахам сирэ» ырыа доҕуһуолунан, кэлэктиибинэй хаартыскаҕа түһүүнэн түмүктэннэ.

Источник: https://сарданагазета.рф/article/96250