Ээйиккэ окко киирии үлэтэ торумналанна

Самаан сайын саҕаланан, от ыйын 18 күнүгэр олохтоох дьаһалтаҕа Солоҕоон нэһилиэгин отчуттарын сүбэ мунньаҕа ыытылынна. Мунньаҕы олохтоох дьаһалта баһылыга Васильева Наталья Ивановна, баһылык солбуйааччыта Быканов Александр Владимирович уонна тыа хаһаайыстыбатын үлэтигэр бэриниилээх Петрова Надежда Николаевна, «Эйик» ТХПК салайааччыта Степанов Петр Александрович иилээн-саҕалаан ыыттылар.

Оттуур сири, от былаана кэмигэр туолуутун быһаарсыы уонна да атын от үлэтигэр сыһыаннаах кэккэ боппуруостары, этиилэри иһиттибит. Көрүллүбүт боппуруостарга баар техиньикэни, оборудованиены, окко тутттуллар тэриллэри аналлаах биригээдэлэргэ үллэрии буолла. Кыстыкка киириигэ өрөмүөн кэккэ үлэлэрин бу нэдиэлэҕэ бүтэрээт, бары күүһү от үлэтигэр уурарга диэн быһаарыы ылылынна.

Биһиги нэһилиэккэ быйылгы от былаана —

250 т, ол иһигэр: «Эйик» ТХПК

— 200 т, кэтэх сылгылаах дьон – 50 т. От туттарыыта былырыыҥҥы олохтоммут сыананан: биир тонна от — 7000 солк.

Быйыл оттооһуҥҥа олохтоох нэһилиэнньэттэн барыта холбоон 20 тахса отчут ходуһаҕа тахсыаҕа.

Алыһардаах эбэ ходуһатыгар биир толору механизированнай звено оттуу тахсар, салаайаччынан өрүү буоларын курдук Егоров Николай Николаевич сылдьыаҕа.

Эйик эбэ тула икки бириигээдэ тахсарын күүтэбит, ону таһынан илиинэн отчуттар тахсаллар уонна олохтоох устудьбуоннар биригээдэлэрэ оттоһорго бэлэмнэнэллэр.

Чааһынай хаһаайыстыбалар эмиэ хаалсыбаттар — кинилэр номнуо отторун охсон саҕалаатылар. Степанов Владимир Николаевич, Семенов Владимир Федотович, Соломонов Леонид Леонидович бэйэлэрин былааннарын толорорго күргүөмнээхтик үлэлэһэллэр.

Сыл ахсын буоларын курдук оҕо лааҕыра үлэлиир. Оҕолор отчуттарга көмө буоланнар субуотунньукка кытталлара күүтүллэр. Иитээччинэн олохтоох оскуола учуутала Иванов Марислав Вячеславович, поварынан устудьбуон кыыс Иванова Сахая тахсыахтара.

От үүнүүтэ быйыл үчүгэй, онон, оппут былаана этэҥҥэ туоларыгар эрэл санаалаахпыт.

Даҕатан эттэххэ, быйылгы дьылга нэһилиэккэ 36 төбө ынах иитиллэн турар. 26 төбө төрүөхтэн 22 тарбыйах хаалан турар. Билиҥҥи кэмҥэ уопсайа 28 ыанар ынахтан күҥҥэ 84 л үүт ыаныллар. Сыспай сиэллээхтэрбитигэр 23 биэ баар. Быйыл саас 12 кулун төрүөх ыллыбыт, ол иһигэр: 10 кэтэх хаһаайыстыбаҕа, 2 төрүөх «Эйик» ТХПК хаһаайыстыбаҕа.

Подробнее: https://xn--80aaaaaqemr0d4akx.xn--p1ai/article/65246