Кыайыы күнүн көрсөр тэрээһиннэр саҕаланнылар

Кэлэр нэдиэлэҕэ, ыам ыйын 9 күнүгэр Арассыыйа дьонун-сэргэтин биир саамай киэҥ далааһыннаах, харах уулаах бырааһынньыга Аҕа Дойду сэриитигэр «Кыайыытын Күнэ” бэлиэтэнэр.

Кыайыы күнүн көрсө билиҥҥиттэн кыралаан тэрээһиннэр саҕаланнылар. Биирдиилээн социальнай ситиминэн үгэс буолбут акцияларга кыттыыны ыларга ыҥырыылар кэлэттииллэр. Ол курдук, соторутааҕыта дьаҥ туруоҕуттан ыла онлайн көрүҥүнэн ыытыллар “Окна Победы” акцияҕа дьон кыра-кыралаан бэлэмнэнэр. Бу тэрээһиҥҥэ, ыал дьиэтин түннүгүн Улуу Кыайыы темалаах киэргэтэн, сэриигэ кыттыыны ылбыт өбүгэлэрин мэтириэтин иилэн, аймах-билэ дьон, оҕо буолан төлөпүөҥҥэ хаартыска эбэтэр видео түһэрэн ыыталлар.

Ону тэҥэ, ыам ыйын 5 күнүттэн 8 күнүгэр диэри Өлөөннөөҕү түмэл “Стена Памяти” тэрээһинигэр кыттыыны ылан баҕалаахтары сэрии кыттыылаахтарын, бэтэрээннэрин ахтан-санаан хаартыска түһэн бэлиэтииргэ ыҥырар.

Оттон билиҥҥи кэмҥэ, 2005 сылтан саҕалаан тиһигин быспакка ыытыллар “Георгиевская лента” диэн биир эмиэ үгэскэ кубулуйбут тэрээһин саҕаланна. Ол курдук, оскуолаҕа үөрэнэр “Волонтеры Победы” түмсүү оҕолоро уулуссанан, тэрилтэлэринэн кэрийэ сылдьан, Улуу Кыайыыны аҕалбыт буойуттар умнуллубаттарын уруйдуур, хара сурааһынаах лиэнтэлэри тарҕаталлар.

Кылгатан санаттахха, бу Лиэнтэ “За победу над Германией в Великой Отечественной войне 1941-1945 гг” уордьан гвардейскай лиэнтэтин тас көстүүтүн үтүктэр уонна, 1990 сыллар ортолоруттан саҕалаан, Арассыыйаҕа Кыайыы Күнүн им-бэлиэлэриттэн биирдэстэрэ билиҥээҥи дылы «Ким да умнуллубат. Туох да умнуллубат.” — этии чуумпу хатыланыыта буолар.

Наталья Нетребенко

Источник: https://сарданагазета.рф/article/96384