Өлөөн эбэҥки национальнай оройуоҥҥа мобильнай биригээдэ оройуон бары нэһилиэктэригэр сылдьан олохтоохтор доруобуйаларын бэрэбиэркэлээтилэр

Хотугу улуустар олохтоохторун доруобуйаларын кэтээн көрүү саҥа бырайыак олоххо киирэр. Муус устар ый ортотуттан Өлөөн эбэҥки национальнай оройуоҥҥа мобильнай биригээдэ оройуон бары нэһилиэктэригэр сылдьан олохтоохтор доруобуйаларын бэрэбиэркэлээтилэр.

Өлөөҥҥө врачевнай мобильнай биригээдэни терапевт быраас Сыромятникова Саргылана Петровна салайан илдьэ сырытта. Бары нэһилиэктэр олохтоохторо быраастар наһаа болҕомтолоохтук көрөллөрүн, эмтэрин анаан, араас консультация биэрэллэрин кэпсээтилэр. Улуус киинин олохтоохторо, доруобуйаларын көрдөрүммүт дьон бары маннык биригээдэлэр кэлэр буолбуттарын астына бэлиэтээтилэр. Ханна да ырааппакка, ороскуотурбакка биир-икки күнүнэн доруобуйаларын туругун биллилэр.

Онтон салгыы эмтэнэр дьоҥҥо республикатааҕы анал балыыһаларга обследование баралларыгар сүбэлээтилэр. Өлөөн олохтооҕо Саргылана Павлова ыалдьар, инбэлиит оҕотунаан икки күнүнэн бары быраастарга көрдөрүнэн, диагнозтарын чопчулаан, эмтэрин анаттылар.Оттон үлэ ветерана Елена Николаевна Константинова оройуон олохтоохторун аатыттан быраастарга махталын этэр.

Источник https://t.me/s/olenek_admin